Mae gan bob rhaglen gynrychiolwr academaidd myfyrwyr er mwyn cynrychioli barn eu carfan. O fewn y 24 ysgol ym Mhrifysgol Caerdydd, mae hyn yn golygu dros 1000 o Gynrychiolwyr bob blwyddyn ar draws y sefydliad. Mae cynrychiolwyr yn pontio’r bwlch rhwng myfyrwyr ac aelodau staff, casglu adborth perthnasol, codi materion mewn cyfarfodydd, ac yn adrodd yn ôl ar unrhyw ganlyniadau.

Caiff Cynrychiolwyr Academaidd Myfyrwyr eu hethol er mwyn lleisio pryderon addysgol eu carfannau. Mae hyn yn golygu eu bod yn delio â materion neu broblemau sy'n codi ynghylch cyrsiau (gan gynnwys asesiadau ac adborth, cynnwys modiwlau, neu amserlennu). Ni ddisgwylir iddynt ddelio ag unrhyw bryderon lles na materion personol sy'n ymwneud â myfyrwyr ar eu cwrs. Fodd bynnag, byddant yn gallu cyfeirio myfyrwyr â phryderon o'r fath at wasanaethau priodol o fewn y brifysgol.

Dylai eich Cynrychiolydd Academaidd Myfyrwyr wneud ei hun yn hysbys i chi yn ystod wythnosau cyntaf y flwyddyn. Gallwch hefyd ddod o hyd i fanylion eich cynrychiolydd drwy glicio ar eich ysgol ar hafan yr Hyb Cynrychiolwyr Myfyrwyr.

Mae gan y Brifysgol strwythur pwyllgorau cynhwysfawr sydd wedi'i gynllunio i sicrhau y gellir datrys neu drafod yr holl adborth ar y lefel briodol. Bydd unrhyw adborth sy'n cael ei drosglwyddo at Gynrychiolwyr Academaidd Myfyrwyr yn cael ei godi gyda staff yr ysgol mewn cyfarfod Panel Staff-Myfyrwyr. Yn dibynnu ar natur y mater, efallai y bydd y panel o staff a myfyrwyr yn dod o hyd i ateb, a fydd wedyn yn cael ei adrodd yn ôl i fyfyrwyr. Os na ellir dod o hyd i ateb, bydd y mater yn cael ei drosglwyddo at bwyllgor priodol arall, a fydd yn gweithio tuag at ddatrysiad.

Mae Paneli Staff-Myfyrwyr yn gyfarfodydd sy'n digwydd rhwng Cynrychiolwyr Academaidd Myfyrwyr a staff yn yr ysgol. Mae'r rhain yn digwydd unwaith y semester, ac maent yn fodd o sicrhau bod deialog effeithiol rhwng staff a myfyrwyr. Arweinir y rhain gan Gadeirydd ac Is-gadeirydd myfyrwyr, ac mae staff yr ysgol yn hwyluso cynnal y cyfarfod. Dylid cyfathrebu unrhyw ganlyniadau o gyfarfodydd Panel Staff-Myfyrwyr gyda myfyrwyr.

Mae’r Fforymau Colegau yn gyfarfodydd a hwylusir gan Undeb y Myfyrwyr, ac maent yn rhoi cyfle i Gynrychiolwyr adrodd am faterion na ellir eu datrys mewn Paneli Staff-Myfyrwyr. Mae'r rhain yn cael eu rhannu yn ôl colegau, ac maent yn cael eu cadeirio gan Swyddogion Sabothol. Gwahoddir Cadeirydd ac Is-gadeirydd pob Panel Staff-Myfyrwyr i fynychu a rhoi'r diweddariad am y materion a drafodwyd yn eu cyfarfod diweddaraf. Bydd Deoniaid y Colegau a staff gwasanaethau proffesiynol hefyd yn bresennol, felly os oes unrhyw adborth nad sy’n addas ar gyfer Paneli Staff-Myfyrwyr, gellir ei godi mewn Fforwm Coleg.

Mae dod yn Gynrychiolydd Academaidd Myfyrwyr yn gyfle gwych. Nid yn unig y gallwch chi gynrychioli eich carfan a chael mewnwelediad i sut mae eich ysgol yn gweithio, byddwch hefyd yn ennill llawer o sgiliau trosglwyddadwy a fydd yn edrych yn wych ar eich CV. Fel Cynrychiolydd, byddwch hefyd yn derbyn gohebiaeth reolaidd gan Undeb y Myfyrwyr gyda chyfleoedd ychwanegol. Gallwch hefyd dderbyn tystysgrif ar ddiwedd y flwyddyn!

Fel Cynrychiolydd Academaidd Myfyrwyr, byddwch yn derbyn hyfforddiant cynhwysfawr gan dîm Llais y Myfyriwr ar gyfer eich rôl, gan gynnwys hyfforddiant pellach os byddwch yn ymgymryd â rôl Cadeirydd neu Is-gadeirydd. Bydd hyn yn mynd â chi drwy'r hyn i'w ddisgwyl o'ch rôl, a'r gefnogaeth sydd ar gael. Byddwch hefyd yn derbyn cyflwyniad gan Gydlynydd Cynrychiolwyr Myfyrwyr eich ysgol, a fydd yn rhoi gwybodaeth i chi am sut y gallwch gyfathrebu â staff a myfyrwyr, a'r hyn y gall fod angen i chi ei ystyried wrth ddarparu adborth.

Gwych! I enwebu eich hun fel Cynrychiolydd Academaidd Myfyrwyr, bydd angen i chi gysylltu â Chydlynydd Cynrychiolwyr Myfyrwyr eich ysgol, neu siarad ag aelod arall o staff a all drosglwyddo'ch manylion i'r person cywir. Os ydych chi'n cael trafferth dod o hyd i'r person iawn, cysylltwch â thîm Llais y Myfyriwr.

Gall cael adborth gan eich carfan fod yn heriol, ond gall eich ysgol eich cefnogi gyda hyn. Mae gan bob ysgol wahanol ffyrdd o wneud hyn, felly mae'n syniad da cysylltu â'ch Cydlynydd Cynrychiolwyr Myfyrwyr i weld pa ddulliau sydd wedi bod yn llwyddiannus ar gyfer cynrychiolwyr blaenorol. Ceisiwch ystyried beth allai fod orau i'ch carfan – os oes gennych 'groupchat' gweithredol, efallai y byddai'n syniad da ei ddefnyddio, ond os nad ydych yn cyfathrebu'n aml iawn, efallai y bydd yn haws gofyn i staff eich helpu i e-bostio'r garfan yn uniongyrchol.

Mae’r rôl yn wirfoddol, ond mae ffyrdd y gellir cydnabod myfyrwyr am ymgymryd â'r rôl. Ar ddiwedd y flwyddyn, gall pob Cynrychiolydd Academaidd Myfyrwyr a gwblhaodd hyfforddiant hawlio tystysgrif fel tystiolaeth o'r sgiliau y maent wedi'u hennill drwy wneud y rôl. Mae hefyd gan Wobrau Cyfoethogi Bywyd y Myfyrwyr gategori ar gyfer Cynrychiolwyr Academaidd Myfyrwyr y Flwyddyn, gydag enillydd ar gyfer pob coleg. Os ydych chi'n creu argraff yn eich rôl, efallai y cewch eich enwebu!